CRTVG

Buscar

Estraga unha xoiería compostelá para roubar despois de que a policía lle quitara unha machada

Publicado o 27/09/2019 13:57

Sucedeu na rúa compostelá do Vilar, na parte da praza do Toural. Contra as catro da mañá de onte, valéndose da tapa dunha arqueta de sumidoiros o ladrón esnaquizou o escaparate da xoiería e levou todo o que puido. Ao parecer nese momento chegou unha patrulla da policía e fuxiu por Entrerrúas.

José Manuel Pazos, propietario da tenda di: "E fóronlle caendo pezas na escapada e a policía foi recolléndoas polo camiño, pero non puideron collelo. Polo de agora non temos valoración do roubado, porque non fixemos inventario aínda".

Levou pezas do escaparate: xoias, aneis, gargantillas, brazaletes..., todo o que puido alcanzar coa man".

Manuel, un veciño achegábase á xoiería para entregar unha desas pezas que atopou esta mesma mañá moi preto.

Ao parecer ao ladrón, horas antes, a policía quitáralle unha machada, coa que estaba a increpar os viandantes. Segundo o dono da xoiería, está identificado. Supostamente, é un dos sen teito que adoitan estar no Toural. A vítima quéixase, como máis comerciantes da zona, da actitude agresiva que mantén.

O dono da tenda di que "están bébedos e en moi malas condicións. Mexan e defecan na rúa, métense cos turistas, métense cos comerciantes, intimídannos. Téñennos vivindo nunha situación de estrés e non só a min, aos comerciantes da zona".

Din os comerciantes que están nunha situación de medo e inseguridade grande e que son necesarias máis patrullas policiais.

Noticias web

27/09/2019