Un total de nove tripulantes do buque hospital Esperanza del Mar, do Instituto da Seguridade Social da Mariña, gardan corentena a bordo da embarcación, atracada no Porto de Vigo, por un gromo de covid-19 con catro casos confirmados. Os cinco restantes, segundo informaron fontes gobernamentais, son contactos estreitos dos infectados.

A outros 19 tripulantes levantáronlles hoxe a corentena, sinalan as fontes. O pasado 19 de xaneiro os tests de antíxenos realizados á tripulación do Esperanza del Mar detectaron unha decena de casos sospeitosos, pendentes de confirmar a través de PCR, cando o buque estaba fondeado fronte ás illas Cíes. 

O Esperanza del Mar e o Juan de la Cosa son dous buques propiedade do Estado que prestan asistencia sanitaria a calquera barco que o solicite e se atope dentro da súa área de cobertura, facilitando tanto a consulta por radio, ambulatoria e mesmo a hospitalización a bordo dos pacientes cando é así prescrita.

Se a gravidade do caso o require, tamén realizan a evacuación a terra do enfermo no medio máis adecuado e rápido posible. Tamén prestan apoio loxístico de emerxencia, como desenganche de redes, servizo de mergulladores ou reparacións eléctrica aos barcos españois que o precisen e, mesmo, a recollida de náufragos.