O portavoz de Galicia en Común-Anova Mareas, Antón Gómez-Reino, considerou este domingo que o presidente galego, Alberto Núñez Feijóo, está a equivocarse na xestión do coronavirus na comunidade autónoma ao non tentar buscar acordos coa oposición.

"Nin Feijóo nin o PP parecen ter intención de acordar coas forzas políticas e sociais de Galicia as medidas de contención da crise sanitaria, para a que tampouco están a ofrecer solucións de ningún tipo", recriminou Gómez-Reino despois de participar na reunión telemática que o xefe do Executivo autonómico mantivo cos representantes dos principais partidos.

Na súa opinión, "é unha imprudencia e unha irresponsabilidade por parte de Feijóo" pensar que pode enfrontar esta crise desde a soidade de "unha maioría absoluta caducada", xa que de cumprirse o calendario electoral previsto -con eleccións o 5 de abril-, "Feijóo xa estaría cesado ou en funcións", sostivo.

Na reunión telemática, Núñez Feijóo non se referiu ao horizonte electoral a pesar de que, segundo puido saber Efe, foi interpelado respecto a iso por un dos portavoces da oposición.

Neste sentido, Gómez-Reino defendeu tamén que non é o momento de "falar de eleccións" xa que o calendario electoral non fai parte da axenda de En Común "nin o fará ata que estea superada a emerxencia sanitaria e se poida garantir un proceso electoral con plena normalidade democrática".

Finalmente, o líder de En Común criticou que a pesar das reunións coa oposición, "o presidente da Xunta non recolle as propostas lanzadas desde o comezo da emerxencia sanitaria pola coalición Galicia en Común" porque, ao seu parecer, Núñez Feijóo limítase a "escudarse nas críticas ao Goberno central".