Por segundo ano as alfombras florais coas que Ares conmemora o Corpus non cubrirán o chan. Pero a vila non queda sen celebración. As flores saltan aos balcóns, ás fachadas, ás portas e ventás, aos escaparates.

Os veciños engalanan con elas as súas casas e negocios. O ano pasado participaron nesta alternativa, imposta pola pandemia, un cento de aresáns. Desta vez, moitos máis, segundo explica Teresa Muíños, a presidenta da Asociación de Alfombras Florais de Ares.

Todos coinciden en que non é o mesmo pero queren manter así o espírito da festa, declarada de interese turístico.

Esta tarde moitos aínda estaban empezando a colocar os adornos florais, que permanecerán expostos todo o día de mañá.