O Goberno anunciou este venres que remitiu un requirimento ao Goberno de Murcia para a retirada do 'pin parental'. Díxoo a portavoz do Goberno, María Jesús Montero, na conferencia de prensa posterior ao Consello de Ministros, onde destacou que o Executivo "abordou con moita preocupación a intención do Goberno murciano de establecer o chamado 'pin parental'", unha esixencia de Vox na negociación dos orzamentos rexionais.

A ministra de Educación, Isabel Celaá, xa anunciou este xoves que o seu departamento recorrería pola vía xudicial calquera iniciativa dirixida a impoñer un 'pin parental' nos centros educativos, ao consideralo "unha censura previa" por parte dos pais ás actividades programadas polos colexios.

En Murcia, PP, Ciudadanos e Vox pecharon un acordo para aprobar os presupostos que inclúe o chamado 'pin parental'. Isto é que as familias se poidan a negar a que os fillos participen en actividades educativas complementarias que Vox considera que adoutrinan, como charlas sobre igualdade ou diversidade sexual. Os de Abascal avanzan que tamén van esixir a medida noutras comunidades como Madrid.

O Ministerio de Educación e Formación Profesional recorrerá pola vía xudicial calquera iniciativa dirixida a impoñer o 'pin parental' nos centros educativos, ao consideralo "unha censura previa" por parte dos pais ás actividades programadas polos colexios.

Este xoves nun comunicado, a ministra Isabel Celaá manifestou o seu "rexeitamento" a esta práctica que cualificou de ilegal. Para o Ministerio, a imposición do denominado 'pin parental' por parte de Murcia aos seus centros educativos é contraria á Lei orgánica de educación (LOE), ás propias normas autonómicas, así como á Lei contra a violencia de xénero.

Subliña, ademais, que a iniciativa "xerou unha gran controversia e rexeitamento por parte da comunidade educativa".

Celaá insistiu en que o veto por parte dos pais á asistencia dos alumnos a estas actividades supoñería unha "obxección de conciencia encuberta" que podería aplicarse a contidos curriculares e que vai en contra da lexislación española.

Así mesmo, contravén diversos tratados internacionais ratificados por España (Convención sobre os Dereitos do Neno, Declaración Universal dos Dereitos Humanos), e o Memorándum da Comisión Europea contra o Racismo e a Intolerancia, a normativa educativa, a lexislación sobre a violencia e a normativa específica en materia LGTBI, sinala o Ministerio.

Educación lembrou que a normativa prescribe que son os docentes quen ten a competencia para deseñar as actividades complementarias que consideren convenientes e dar así cumprimento ao establecido nos currículos correspondentes.

O propio Tribunal Constitucional sinalou en diversas sentenzas que o dereito á obxección de conciencia só existe no noso ordenamento nos casos expresamente contemplados pola Constitución e as leis.

En Andalucía, a implantación do 'pin parental' foi una as condicións de Vox para negociar o Goberno autonómico co PP, do mesmo xeito que sucedeu en Murcia, onde este debate acapara os titulares destes días.

Este xoves na comunidade madrileña, o vicepresidente Ignacio Augado advertiu a Vox que na negociación dos orzamentos rexionais para 2020 Ciudadanos e o Executivo non van recortar "dereitos e liberdades civís", non van tocar políticas en materia de violencia machista nin introducir o 'pin parental'.

Pola súa banda, a asociación de extrema dereita e ultracatólica Hazte Oir asegura que recadou 55.000 firmas ata o momento para solicitar aos presidentes autonómicos de Madrid, Murcia, Andalucía e Castela e León, e aos líderes de Vox, PP e Ciudadanos a implantación desta "solicitude de información previa e consentimento expreso".

Queren que os centros informen previamente os pais sobre calquera actividade, charla, taller ou similar que afecte os valores do alumno en materia afectivo-sexual, diversidade sexual e modelos de familia.