Primeiro debate dos seis candidatos á presidencia da Comunidade de Madrid. Foi un cara a cara moi duro en que se falou da xestión da pandemia, de inmigración e de futuros pactos de goberno.

Os seis candidatos chegaban a Telemadrid con obxectivos diferentes. PSOE, Unidas Podemos e Más Madrid para desmontar a xestión de Isabel Díaz Ayuso. A candidata popular, para reafirmar o apoio ata agora das enquisas, que a dan como gañadora o 4 de maio. Ciudadanos e Vox, para manteren a fidelidade dos seus votantes e evitaren traspasos de votos. Todos, para captaren os 600.000 madrileños indecisos. O primeiro bloque do debate, un dos máis duros: a pandemia.

Un dos maiores enfrontamentos produciuse no bloque económico e de asuntos sociais, sobre todo ao falaren das colas da fame e dos menores estranxeiros non acompañados (MENA). Un tema en que Ayuso quixo distanciarse de Vox. 

Foi no tema dos impostos no que chegaron a enfrontarse, por única vez, Gabilondo e Iglesias. Sobre os pactos postelectorais, cada candidato marcou as súas preferencias. Unidas Podemos e Más Madrid comprometéronse a formar goberno cos socialistas. Gabilondo dixo confiar no apoio de Iglesias para frear a foto de Colón. A candidata de Vox garantiu que os seus votos frearán a esquerda. Ayuso evidenciou que a súa única alternativa para conservar a presidencia pasa por sumar maioría con Vox. E Ciudadanos aposta por reeditar a coalición co Partido Popular.