Está previsto que nas próximas horas declaren no xulgado dous detidos nunha operación policial contra unha organización criminal sospeitosa de distribuír grandes cantidades de haxix en Vigo e a súa comarca. Ao parecer, membros da organización desprazábanse a Andalucía tres ou catro veces ao mes para adquirir haxix a organizacións marroquís, co que podían transportar máis de 100 quilos desta droga.

A noite pasada, axentes da unidade contra a droga e o crime organizado interceptaron o coche dos traficantes cando chegaba a Vigo e rexistraron esta vivenda unifamiliar situada preto da avenida do Aeroporto. A operación rematou co comiso de 30 quilos de haxix e a detención de dous homes de 36 e 30 anos, de nacionalidade española e veciños de Vigo e do Morrazo. A policía non descarta que haxa máis detencións porque a operación segue aberta.