Dentro de Europa, queremos pararnos no caso de Grecia, un país mediterráneo que ofrece cifras, afortunadamente, moi baixas de afectación desta pandemia. Uns 2.100 afectados e 101 mortos, segundo os últimos datos.

Diego Peláez, que está a vivir en primeira persoa o confinamento nese país, é un futbolista compostelán que xoga no Trícala, a unhas tres horas de Atenas.

"O 12 de marzo tivemos a primeira morte en Grecia e desde ese día tomáronse medidas drásticas. Pecharon as fronteiras. Había moita xente que quería entrar de Turquía. Estiveron máis rápidos que en España e en Italia, se non, polo tipo de país, seguro que viviriamos unha situación semellante".

"Hai 25 días, o Goberno grego puxo dous voos a España. Eu non conseguín ningunha praza e desde aquela non hai voos. Mesmo tentando viaxar con varias escalas, cancélanchos. É imposible saír do país".

"Eu rematei contrato co equipo hai unha semana. Pero o meu caso non é o único. Haberá moita xente nunha situación semellante. Sorprende que vivindo dentro da Unión Europea non poidas volver ao teu país".

"Creo que a xente en Grecia está sendo máis disciplinada, sobre todo vendo o sistema público, a sanidade, que dista bastante da que temos en España. Nos hospitais aquí teño a sensación de volver ao pasado. A xente está moi concienciada e cumpren ao 100%".

"Trícala é unha cidade parecida ao que pode ser Pontevedra, con arredor de 70.000 habitantes. A crise do 2008 foi especialmente cruenta aquí. Afectou moito o sistema sanitario".