Axentes do Corpo Nacional de Policía detiveron un home de 57 anos, veciño de Lugo e sen antecedentes, por agredir sexualmente unha menor de idade nun centro comercial da capital lucense.

Segundo informou a comisaría provincial, os feitos sucederon na tarde de onte, cando se recibiu en dependencias policiais unha chamada efectuada desde un centro comercial da cidade para avisar de que o servizo de seguridade tiña retido un home por realizarlle tocamentos nas súas partes íntimas a unha menor.

Axentes da Policía Nacional desprazáronse de inmediato ao centro comercial e falaron por separado co home, que estaba retido polos vixilantes de seguridade, e coa vítima, unha moza menor de idade que estaba acompañada por unhas amigas e pola nai dunha delas.

Segundo o testemuño das denunciantes, entraron no citado establecemento comercial e o home achegóuselles por detrás e tocou unha das nenas.

Ao ser recriminado, tentou marchar do lugar con paso rápido, pero elas solicitaron a colaboración do persoal de seguridade do centro, que lle cortou o paso, reténdoo ata a chegada das patrullas.

A Policía Nacional quixo destacar o bo comportamento do vixilante de seguridade, que mediou para "acougar os ánimos" e retivo o suposto agresor sexual ata a chegada dos axentes.

O home foi detido e trasladado a dependencias policiais, á espera do seu paso a disposición xudicial.