A Garda Civil detivo en Calpe (Alacante) a Johannes Fasen, de nacionalidade holandesa e considerado como o principal artífice da macrofraude europea da carne de cabalo destapada en 2013, pola que xa foi condenado en Francia.

Segundo informa a Dirección Xeral da Garda Civil, a detención practícase a requirimento das autoridades francesas tras condenalo a xustiza gala pola maior estafa alimentaria de Europa, o caso Horsegate, que destapou a comercialización de carne de cabalo facéndoa pasar por tenreira.

Un escándalo que saltou no Reino Unido en 2013, cando se descubriu que unha importante empresa cárnica francesa vendera centos de toneladas de carne de cabalo como de tenreira coa que se fabricaban pratos precociñados como lasañas, musakas ou chili.

Aínda que a trama foi destapada no Reino Unido, pronto se descubriu que a rede se estendía en máis dunha ducia de países.