O gromo de coronavirus iniciado na área de xeriatría do hospital vigués Meixoeiro ampliouse coa detección de 16 casos máis, tras o cribado realizado a pacientes hospitalizados noutras unidades, segundo confirmaron fontes do Sergas. Así, neste hospital confirmáronse un total de 37 casos, dos que 28 son pacientes ingresados e 9 son profesionais.

Os novos casos entre pacientes correspóndense con enfermos que estaban ingresados noutra zona da planta terceira, no servizo de Xeriatría e Rehabilitación. Os pacientes con covid-19 foron trasladados ao hospital Álvaro Cunqueiro, onde se centraliza a atención desta patoloxía.

Por esta situación e de modo preventivo, este martes volveuse a ampliar o número de camas covid no Álvaro Cunqueiro (nas últimas horas anunciouse o aumento de 44 camas, ante o incremento nos ingresos por coronavirus).

Nesta xornada habilitáronse 16 camas adicionais na vela 1C, de modo que, en todo o hospital, son xa 174 as camas destinadas a pacientes con esta infección (134 para casos confirmados e 40 para sospeitosos).

Ademais da dotación de camas, a área sanitaria viguesa ten reprogramado cirurxías non urxentes, para evitar a ocupación das unidades destinadas a coidados críticos por parte deses pacientes intervidos.