Un numeroso equipo da Garda Civil detivo un veciño de Muros que supostamente traficaba con droga no seu domicilio, situado na zona vella desta localidade. De feito, no rexistro da vivenda interviñéronlle máis de 400 gramos de cocaína e máis de 100 de haxix, ademais de básculas de precisión, 20.500 euros en metálico e munición.

O equipo da Policía Xudicial da Garda Civil de Noia comprobou que numerosos veciños de Muros e doutras localidades próximas acudían ao domicilio deste individuo para adquirir substancias estupefacientes.

Ademais do incumprimento do estado de alarma, o instituto armado indica que este inmoble "podería converterse nun punto de contaxio masivo na localidade de Muros, expoñendo así a toda a poboación" da vila.

"En caso de que houbese algún positivo por COVID-19 no interior da vivenda ou algún dos compradores estivese contaxiado, as consecuencias, polo menos en termos cuantitativos, poderían ser enormes".

A operación desenvolveuse de noite e rematou coa detención do individuo, xa posto a disposición xudicial.