Baixa o paro e medra o emprego en maio, un bo mes para o mercado laboral polo inicio da temporada turística. Deixa 84.075 desempregados menos en España. En Galicia, o paro descende por riba da media estatal, en 5.421 persoas. No conxunto do estado créanse preto de 211.800 empregos.

Maio dálle pulo ao emprego e reduce as listas do paro. En Galicia baixa en 5.421 persoas (-3,2 %). Xuño arranca con 160.805 inscritos nas oficinas do Servizo Público de Emprego. Son case 16.000 menos que hai un ano. A Xunta destaca este dato que afecta, di, todos os colectivos prioritarios nas políticas do Goberno galego.

A secretaria xeral de Emprego, Covadonga Toca, asegura: "Sitúanos en niveis de paro inferiores aos de hai nove anos. O descenso, dun 8,9 é un descenso superior en máis de tres puntos á media do conxunto de España".

No conxunto de España o paro cae en 84.075 persoas (-2,6%). O total, 3.079.491 desempregados, é o nivel máis baixo en dez anos. Lidera o descenso o sector servizos. Nun mes en que incide o inicio das contratacións de verán, tamén medra o emprego. A Seguridade Social suma preto de 211.800 (211.752) afiliados novos. Achégase aos 19 millóns e medio de ocupados e roza o seu máximo histórico. Máis dun millón están en Galicia. Son 20.000 máis ca hai un ano.