Tras dúas xornadas de loita intensa contra as lapas, dan por controlado o incendio forestal que arrasou a parroquia courelá de Folgoso. Segundo as estimacións provisionais, arderon unhas 160 hectáreas de monte nun incendio que se achegou ás vivendas no núcleo de Ferreirós de Abaixo. Nos labores de extinción participaron 45 brigadas, 14 axentes e 20 motobombas, aínda que os medios aéreos, nove avións e dous helicópteros, tiveron un especial protagonismo debido ao carácter abrupto do terreo.

Matilde Arza, Protección Civil de Folgoso do Courel: "O lume comezou na noite do venres ao sábado, sobre as cinco da mañá, e ata alí desprazáronse brigadas de incendios, helicópteros, hidroavións, o GES, Protección Civil e a Garda Civil co finde intentar evitar que o lume fose cara ás vivendas de Ferreirós de Abaixo".

O lume declarárase no monte pola noite, sen que houbese ningunha treboada. Sospéitase, por tanto, que foi intencionado.

Matilde Arza, Protección Civil de Folgoso do Courel: "Puido ser intencionado pois porque xurdiu de noite, non había tormenta, e no medio do monte elementos inflamables en principio non debería haber".

A Garda Civil investiga agora as causas deste incendio, o terceiro xa desta tempada na serra do Courel.