Os casos activos seguen á alza, e nunha semana soben en máis dun millero ata os 2.638
A situación epidemiolóxica en Galicia continúa empeorando progresivamente. Hoxe o Sergas notifica 2.638 casos activos, 172 máis ca onte, tras 235 novos positivos. Son case 1.100 casos máis que hai xusto unha semana.
Casos activos por área sanitaria:
A Coruña: 643 (+16)
Vigo: 479 (+50)
Ourense: 336 (+25)
Santiago: 247 (+10)
Lugo: 284 (+20)
Pontevedra: 646 (+36)
Ferrol: 103 (+15)
Leve baixada nos hospitalizados
A presión asistencial sufriu nas últimas dúas semanas un lixeiro aumento que sitúa o total de persoas ingresadas por mor do coronavirus en Galicia en preto das 60. Hai 47 persoas en planta (-3) e 12 nas UCI (+1). Polo de agora, a vacinación e a idade do grupo máis afectado semellan frear o impacto do que apunta ser a cuarta vaga en Galicia.
Preto do 6 % de positividade
Outro mal dato é o da taxa de positividade. Das 3.964 probas PCR realizadas, 230 deron positivo, o cal revela unha taxa de positividade do 5,80 %. Encadeamos así seis xornadas consecutivas superando o limiar máximo recomendado pola OMS do 5 %.