A Audiencia Nacional condenou a penas que van dos oito aos 53 anos de cárcere tres membros da célula xihadista que perpetrou os atentados do 17 de agosto de 2017 nas Ramblas (Barcelona) e no paseo marítimo de Cambrils (Tarragona). Mediante o atropelo masivo cunha furgoneta, mataron 16 persoas e 140 quedaron feridas.

En concreto, a sección terceira da Sala do Penal condena a 53 anos de prisión a Mohamed Houli, ferido na explosión en Alcanar (Tarragona), 46 a Driss Oukabir, que alugou a furgoneta das Ramblas.

A sentenza atribúelles delitos de pertenza a organización terrorista; tenza, depósito así como fabricación de substancias ou aparellos explosivos e inflamables de carácter terrorista e estragos en tentativa de carácter terrorista en concurso con 29 delitos de lesións por imprudencia grave.

A Sala, con todo, rexeitou considerar a ambos os dous coautores de 14 delitos de homicidio en tentativa de carácter terrorista, así como de 34 delitos de lesións de carácter terrorista e de cinco de lesións por imprudencia como pedían algunhas acusacións, non así a Fiscalía.

A Said Ben Iazza a Audiencia Nacional condénao a oito anos polo delito de colaboración con organización terrorista, ao prestar a súa documentación e un vehículo para mercar e transportar artefactos explosivos. Ademais, imponlle a inhabilitación absoluta e especial, así como a prohibición de achegarse a Alcanar durante cinco anos desde que cumpra a pena de prisión.