Condenado o apoderado e outro empregado dun negocio de compravenda de coches do Milladoiro, preto de Santiago, por un delito continuado de estafa. Alteraban os contaquilómetros dos vehículos, ata reducir á metade os quilómetros, para vendelos a un prezo superior.

Diante do tribunal da sección da Audiencia provincial con sede en Santiago sentaban tres acusados, pero tras o acordo do seu avogado coa fiscala, un deles quedou absolto. Os outros dous recoñeceron ser os responsables de reducir ata a metade a quilometraxe de máis dunha decena de coches usados que venderon en Autos Luminita, no Milladoiro, a un prezo máis alto de que realmente valían.

A Nicu Preda, o apoderado da empresa, condenárono a dous anos de cárcere e a unha multa de case mil euros. Para o outro procesado, a condena é dun ano e oito meses de cárcere e a mesma multa. Ademais, terán que indemnizar cun total de 14.600 euros a cinco dos clientes que estafaron. Ningún dos dous terá que ingresar en prisión, a non ser que non paguen esa indemnización ou durante os próximos dous anos volvan delinquir.