A Audiencia Nacional condena 12 dos 19 acusados da excúpula de Pescanova polas operacións irregulares desenvolvidas desde a dirección da empresa. A sentenza relata como a partir da crise de 2008, Fernández de Sousa e o seu grupo de confianza deseñaron unhas prácticas para seguir obtendo financiamento bancario e manipularon as contas e outros documentos para captar novos investidores.

No xuizo, o expresidente recoñecera que "puideron cometer erros, pero non delitos". A Audiencia condena a seis anos de prisión a Manuel Fernández de Sousa polos delitos de falsidade en documento mercantil, estafa, falseamento de contas anuais e de información económica e financeira. E dous anos máis por alzamento de bens. En total, oito anos de prisión.

As penas son máis baixas das que pedían as acusacións, porque algúns dos delitos foron simples medios para cometer outros. Hai outros 11 condenados a penas de entre seis meses e tres anos e medio de prisión, entre eles Rosario Andrade, a muller do expresidente, condenada a un ano de cadea por alzamento de bens.