Hashem Abedi, irmán de Salman Abedi, o autor do atentado suicida de maio de 2017 en Mánchester no que morreron 22 persoas, foi condenado este xoves por un tribunal británico a 55 anos de cárcere pola súa participación nese ataque.

O 22 de maio de 2017, tras un concerto da cantante estadounidense Ariana Grande na cidade inglesa de Mánchester, Salman Abedi cometeu un atentado suicida en que faleceron 22 persoas, 7 delas nenos, e outras 512 quedaron feridas. Tras o suceso, Hashem Abedi, de 23 anos, foi apresado en Libia e O Reino Unido pediu a súa extradición pola súa posible implicación nos feitos, un proceso que terminou coa condena de hoxe.

Ao dar a coñecer hoxe o seu ditame no tribunal penal de Old Bailey, no centro de Londres, o xuíz Jeremy Baker considerou que Hashem Abedi e o seu irmán foron "culpables por igual polas mortes e feridas causadas por esa explosión".