A Policía Nacional detivo os cinco implicados na liorta da semana pasada ás portas dun colexio de Lugo. Catro dos detidos quedaron en liberdade logo de prestar declaración á espera do xuízo e o quinto ingresou en prisión acusado dun delito de tentativa de homicidio. Todos eles contan con antecedentes penais. A liorta produciuse na hora de entrada ao colexio, polo que numerosas testemuñas presenciaron o intercambio de golpes e mesmo o atropelo dun dos implicados.

Segundo o informe policial, foi outro episodio dun enfrontamento entre clans, en que xa se producira a incautación de varias armas de fogo e o cruzamento de ameazas a través das redes sociais.