Chile e Galicia analizan as oportunidades de negocio no mercado de drons de América e Europa. Intercambian impresións e coñecementos na terceira edición do Foro Aeroespacial que comezou este mediodía en Santiago.

Esta nova edición do Foro Aeroespacial Chile-España ten como obxectivo principal analizar as oportunidades de negocio no sector dos drons e fomentar a cooperación de empresas aeronáuticas e centros tecnolóxicos e de investigación dos dous países. A elección de Galicia para acoller este encontro non foi casual.

Emilio Gilolmo, presidente da Fundación Chile-España: "Galicia converteuse nun referente de primeiro nivel en aeronáutica no ámbito espacial e no desenvolvemento e fabricación de avións non tripulados".

Neste senso, o conselleiro de Economía, que participou na inauguración do foro, explicou os traballos que se están a desenvolver no polo tecnolóxico de Rozas e das súas posibles aplicacións en Chile.

Francisco Conde, conselleiro de Economía, Emprego e Industria: "Podemos falar do sector mineiro, do seguimento e mantemento de redes electrificadas, de salvamento marítimo, de prevención de incendios forestais... Temos un gran campo onde o importante é identificar as solucións tecnolóxicas e as diferentes aplicacións".

O sector dos drons está en pleno crecemento. Move un mercado global de 6.000 millóns de dólares e está previsto que se duplique nos próximos tres anos.