A Policía francesa detivo o autor principal do ataque con arma branca cometido hoxe preto da antiga sede da revista "Charlie Hebdo", así como un sospeitoso pola súa posible relación co feito, que deixou dúas persoas feridas, informou a Fiscalía Nacional Antiterrorista de Francia. 

O fiscal Rémy Heitz declarou á prensa que se abriu unha investigación por intento de asasinato e por asociación terrorista criminal debido ao lugar dos feitos, á vontade de matar esas dúas persoas e por ter lugar ao mesmo tempo en que se celebra o xuízo polo atentado contra "Charlie Hebdo", cometido en 2015. 

A Fiscalía non ofreceu detalles sobre o detidos pero, segundo os medios franceses, o autor principal ten 18 anos e antecedentes por delitos comúns e tenencia ilegal de armas, mentres que da segunda persoa tan só transcendeu que naceu en 1987. 

A investigación está en mans da Dirección Rexional da Policía Xudicial de París (DRPJ) e da Dirección Xeral da Seguridade Interior (DGSI). 

O primeiro ministro francés, Jean Castex, desprazouse ata o lugar do ataque para condenar o sucedido e transmitir a solidariedade do Executivo coas vítimas e a contorna dos afectados. "É unha ocasión para o Goberno da República de lembrar o seu compromiso indefectible coa liberdade de prensa, a súa vontade de loitar contra o terrorismo con todos os medios e a súa plena mobilización", apuntou. 

Unha das dúas vítimas resultou ferida de gravidade, pero a súa vida non corre perigo. Segundo os medios locais, son dous produtores, un home e unha muller, da axencia audiovisual de prensa, que baixaran á rúa a fumar. 

O ataque ten lugar en pleno xuízo polo atentado contra "Charlie Hebdo", cometido o 7 de xaneiro de 2015 e no que morreron 12 persoas. O proceso comezou o 2 de setembro e está previsto que dure até o 10 de novembro. 

"Todo o equipo de 'Charlie' achega o seu apoio e a súa solidariedade aos seus antigos veciños e colegas @PLTVfilms e ás persoas afectadas por este odioso ataque", indicou en Twitter o semanario satírico, que estivo no punto de mira por publicar caricaturas de Mahoma.