Seis persoas morreron en menos dun mes en Galicia en accidentes de tractor, catro delas nas últimas dúas semanas. Este luns era un home en Santa Comba e o xoves á noitiña outro home en Vilaboa.

En case todos os casos, a vítima é unha persoa de avanzada idade que queda atrapada pola máquina tras un envorcamento, tal e como confirma o persoal dos servizos de emerxencias que acode aos sinistros.

Ademais, o profesor do Centro de Formación e Experimentación Agroforestal de Guísamo Vicente Manso, que ademais é técnico en prevención de riscos, explica que a maior parte dos accidentes con resultado mortal prodúcense cando as máquinas non teñen medidas básicas como a cabina, que proporciona unha protección envolvente ao condutor.

Os expertos en seguridade advirten de que aínda hai moitas máquinas agrícolas en uso que carecen de cabina e da seguridade básica. Por iso lembran a obrigatoriedade de ter ao día as revisións do vehículo e recomendan que eviten conducilo persoas de avanzada idade.