A presidenta da Comunidad de Madrid, Isabel Díaz Ayuso, afirmou este martes que un confinamento domiciliario sería "a última solución" para frear a propagación do coronavirus na rexión, e asegurou que traballará "sen descanso" para que esa medida "sexa algo impensable".

Tras visitar a nova unidade de coidados intensivos (UCI) do hospital Gregorio Marañón, Ayuso sinalou que "as consecuencias dos confinamentos domiciliarios xa as coñecemos", e que xeran "outros moitos problemas", polo que é prioritario "evitalo".

"Imos buscar solucións intermedias (...) Madrid ten unha estratexia que xa se está cumprindo e que está a funcionar", subliñou a xefa do Executivo madrileño, quen recalcou o "dano económico" que podería provocar un peche total da actividade e sostivo que "a economía e a saúde non están rifadas".

Ayuso asegurou que no seu Goberno non están "relaxados" nin "confiados", porque son conscientes de que "queda moito por facer" e de que "este virus é moi traidor: nun momento dado cambia a dirección do vento e podemos ter outra vez aquí o incendio".

"O que estamos a facer agora é traballar para manter o noso plan porque nós non somos partidarios de abrir e pechar, de abrir e pechar, de abrir e pechar", engadiu Ayuso, que optou por decretar o peche perimetral da Comunidade de Madrid durante a recentemente concluída ponte de Todos os Santos.

Unha medida que, segundo a presidenta, "non se trata dun peche por días, de si, non, si, non; trátase dun peche por movementos".

Dende a comunidade científica insisten na necesidade de tomar medidas urxentes para evitar un novo confinamento. Fundamental -din- o teletraballo obrigatorio e a teleeducación.

Álex Arenas, físico e experto en análises de epidemias explica que se non somos rápidos para que haxa un decreto de teletraballo obrigatorio e de teleeducación para os ciclos superiores, "teremos un confinamento antes de finais de ano"

Castela e León pecha restaurantes e suspende as visitas ás residencias

O presidente da Junta de Castela e León, Alfonso Fernández Mañueco, anunciou este martes que desde o vindeiro venres os restaurantes e establecementos de hostalería permanecerán pechados ao público, só con servizo para levar ou a domicilio, e ademais as visitas ás residencias de maiores quedarán suspendidas para evitar contaxios da covid-19.

Tras unha reunión extraordinaria do Consello de Goberno de Castela e León e do grupo de expertos autonómico, Mañueco pronunciou unha declaración institucional enque insistiu en que a comunidade se atopa en "risco máximo" e pediu ao Goberno central que asuma a súa responsabilidade para tomar medidas que a Junta non pode ditar co marco normativo actual.

Na declaración institucional, o presidente castelán-leonés non precisou o tempo durante o que estarán vixentes estas medidas.

Outras rexións como Asturias ou Melilla van máis alá e xa solicitaron o confinamento na casa. Pero polo momento o Goberno descártao, e insiste en esperar a ver a eficacia das medidas actuais.

Carmen Calvo, vicepresidenta primeira do Goberno di que "imos intentar que iso non chegue, non adiantemos fases", e explica que  agora hai que concentrarse en seguir as normas e ver que resultado dan as actuais medidas.

A Comunidade Valenciana prorroga o seu peche perimetral unha semana máis

O presidente da Generalitat valenciana, Ximo Puig, anunciou a prórroga do peche perimetral nesta comunidade durante, "como mínimo", unha semana máis para tentar conter o avance da pandemia.

Tras visitar esta mañá a nova sede da Confederación Hidrográfica do Segura (CHS) na localidade alacantina de Orihuela, o xefe do Consell sinalou aos xornalistas que toma esta decisión "no marco das medidas que se están adoptando para frear a pandemia da covid-19".

Desde o venres pasado ás 12.00 horas está prohibida a entrada e saída da Comunidade Valenciana excepto por motivos xustificados.

Andalucía suma 3.937 novos casos de covid-19 e 34 falecidos

Andalucía sumou nas últimas vinte e catro horas 3.937 novos casos de covid-19 diagnosticados por PCR e test de antíxenos, mentres os falecidos por esta enfermidade situáronse en 34 persoas, o mesmo número que na xornada do luns.

A incidencia acumulada é de 545,33 casos diagnosticados por cada 100.000 habitantes, o que coloca a comunidade autónoma no número 11 do total das autonomías.

Os contaxios en Euskadi soben a 1.120 e a porcentaxe de positivos ao 9,4 %

Euskadi volveu experimentar nas últimas horas unha nova repunta tanto dos contaxios da covid-19, ao diagnosticarse este luns 1.120 casos, como da porcentaxe de positivos, que se sitúa no 9,4 %.

Estes datos empeoran as cifras do anterior informe epidemiolóxico do Departamento de Saúde do Goberno Vasco, en que se constataron 972 novos contaxios e unha positividade do 7,8 % o pasado domingo.

A situación hospitalaria en Euskadi segue complicándose para o tratamento dos casos máis graves e xa son 106 os pacientes ingresados en camas de UCI (2 máis que o domingo) e 460 en planta (9 menos). Este luns ingresaron 73 persoas máis en planta dos hospitais de Osakidetza (30 máis ca a véspera).

A taxa de incidencia acumulada en catorce días no conxunto de Euskadi continúa crecendo e atópase en 715,7 por cada 100.000 habitantes, cando o domingo estaba en 693,1 casos.