Pep Canadell, un dos investigadores e redactor do informe do IPCC (o Grupo Intergobernamental de Expertos sobre o Cambio Climático), responsabilizou os seres humanos de que o cambio climático estea a afectar a todas as rexións habitadas do mundo, provocando fenómenos meteorolóxicos extremos.

Para Canadell, as políticas climáticas deben ser o suficientemente agresivas para levar a cero as emisións de dióxido de carbono a mediados de século. "Non temos moito tempo", advertiu o experto. "Cada décima de grao que podamos evitar é unha gran ganancia para o planeta" , salientou. 

Canadell explicou que ainda reducindo as emisións, seguiremos contaminando a atmosfera durante polo menos tres décadas máis. Pero se non facemos nada, a temperatura seguiría aumentando indefinidamente.

"Se poñemos as emisións a cero a metade de século, poderemos empezar a estabilizar a temperatura e a final de século teríamos de 1,5 graos por enriba a cando empezamos e emitir gases de efecto invernadoiro", explicou. 

O experto destaca que o informe atribúe por primeira vez a acción humana sobre o cambio climático.

"Vagas de calor como a de 2015 en Europa son agora cinco veces máis probables", asegurou.

Os episodios de frío xa están diminuíndo e as secas estanse agravando, como sucede no sur de España. Canadell sitúa o Mediterráneo como zona cero do cambio climático.

"A pegada do ser humano está vencellada claramente cos episodios de incendios, vagas de calor, chuvia intensa e vagas de calor mariñas", conclúe.