As forzas de seguridade e os servizos de Emerxencias buscan unha peregrina que se perdeu pola zona do Cebreiro. A muller, de nacionalidade italiana, desviouse nalgún lugar entre Vilafranca do Bierzo e O Cebreiro preto do mediodía. Foi ela mesma quen alertou o 112, pero non deu precisado a súa localización. Só dixo que non podía seguir camiñando porque tiña moita dor nas pernas.

A Garda Civil, membros do GES de Becerreá e efectivos de Protección Civil de Sarria e da Fonsagrada tratan de dar con ela.