Falecen dous mariñeiros do Sempre Güeto, que se afundiu preto de Cedeira
• Un deles morreu tras ser evacuado en helicóptero ao CHUAC e o outro foi recuperado sen vida do mar por outro pesqueiro
• Oito tripulantes do barco de Portosín foron rescatados
Salvamento Marítimo
Dous mariñeiros faleceron tras o afundimento do cerqueiro Sempre Güeto, con base en Portosín, sobre as 13:30 horas, cando navegaba nas proximidades de Santo André de Teixido, entre Punta Candieira e o veciño concello de Cariño, ao norte de Cedeira.
O Pesca 2 sumouse hoxe ao operativo de rescate en Cedeira do “Sempre Güeto” que, lamentablemente, non tivo un feliz desenlace. O noso apoio ás familias dos falecidos e aos seus compañeiros. pic.twitter.com/uWm7STq8Ai
— Gardacostas Galicia (@GardacostasGal) June 17, 2021
Oito tripulantes foron rescatados por barcos que faenaban na zona e foron levados a Cedeira a bordo doutro buque cerqueiro, o Argote 2, tamén con base no mesmo porto. Algúns dos afectados foron trasladados a un centro hospitalario por lesións.
Un noveno foi rescatado con vida inicialmente. Estaba ferido grave e foi evacuado polo Helimer 402 ata A Coruña. Nunha operación coordinada co CHUAC, o helicóptero aterrou en Alvedro e unha ambulancia do 061 trasladouno ao hospital. Non obstante, finalmente faleceu.
Efectivos de Salvamento Marítimo e Gardacostas de Galicia, xunto a varios barcos pesqueiros, buscaron outro mariñeiro que desaparecera no mar. Finalmente, contra as cinco da tarde, outro pesqueiro atopou o seu corpo sen vida, que foi trasladado a Cedeira.
O Sempre Güeto regresaba de Asturias, onde estivo a faenar ata a pasada noite. Fontes do operativo indicaron a EFE que un golpe de mar puido desencadear o afundimento. A ondada e o forte vento nesa zona dificultaron as tarefas de salvamento. A tripulación do Sempre Güeto, que envorcou e cuxa quilla quedou ao sol, foi auxiliada por varios barcos que colaboraron nos traballos de procura.