CRTVG

Buscar

Bruxelas propón que España reciba 21.300 millóns para financiar os ERTE

Publicado o 24/08/2020 16:59

A Comisión Europea propuxo este luns que España reciba un préstamo de 21.300 millóns de euros no marco do fondo europeo contra o desemprego, coñecido como SURE polas súas siglas en inglés, para facer fronte aos ERTE e outras medidas excepcionais postas en marcha pola pandemia de coronavirus. 

España será o segundo estado membro que máis se beneficie deste instrumento, só por detrás de Italia, con 27.400 millóns, segundo a proposta publicada por Bruxelas, que agora deberá ser debatido e adoptado polo Consello. O anuncio chega tras o proceso de consultas da Comisión cos Estados membros que requiriron a axuda e tras avaliar as súas peticións. 

No caso de España, foi o primeiro país que a solicitou e situou a súa petición arredor de 20.000 millóns. A idea é que 15 países da UE dispoñan de 81.400 millóns deste instrumento. Desta forma, Bélxica recibirá 7.800 millóns, Bulgaria, 515, Chequia, 2.000, Grecia, 2.700, Croacia, 1.000. Italia 27.400 millóns, Chipre, 479, Letonia, 192, Lituania, 602, Malta, 244, Polonia, 11.200, Romanía, 4.000, Eslovaquia, 631, e Eslovenia, 1.100 millóns. 

Portugal e Hungría tamén presentaron solicitudes formais pero estas seguen baixo estudo da Comisión. Estes préstamos axudarán aos Estados membros a abordar os aumentos repentinos do gasto público para preservar o emprego. En concreto, servirán para cubrir os custos directamente relacionados co financiamento dos plans nacionais de traballo a xornada reducida e outras medidas similares que puxesen en marcha como resposta á pandemia de coronavirus, en particular para os autónomos, informou a Comisión. 

Segundo a súa presidenta, Ursula von der Leyen, esta proposta marca un importante paso para salvar os empregos e o sustento vital.

"Só catro meses despois de que propuxese a súa creación, a Comisión expón conceder 81.400 millóns baixo o instrumento SURE para axudar a protexer os traballos e aos traballadores afectados pola pandemia", valorou. 

Para a conservadora alemá o fondo europeo de desemprego é un "símbolo de solidariedade" ante unha crise sen precedentes e a mostra de que Europa está "comprometida" con protexer aos seus cidadáns. O SURE conta, en termos globais, con 100.000 millóns de euros e foi concibido por Bruxelas no medio da pandemia para "apoiar os réximes nacionais de redución do tempo de traballo ou medidas similares".

En conferencia de prensa, unha portavoz da Comisión non detallou en que prazo poden recibir os estados membro esta axuda, aínda que lembrou que quedan por asinar as garantías bilaterais con algúns países.