O primeiro ministro británico, Boris Johnson, abandonou esta tarde a unidade de coidados intensivos e continuará ingresado na planta do hospital St Thomas de Londres, onde se recupera da COVID-19. Un portavoz de Downing Street, o seu despacho oficial, subliñou que o xefe de Goberno mantén un "ánimo extremadamente bo" e continuará sendo "monitorizado de preto" polos médicos. Johnson, de 55 anos, pasou tres noites na unidade de críticos, onde foi trasladado o luns, un día despois do seu ingreso con síntomas "persistentes" do novo coronavirus.

O seu portavoz oficial detallou que se atopa na "fase temperá da súa recuperación", despois de confirmar esta mañá que a súa saúde continuaba mellorando. O primeiro ministro, que recibiu tratamento con osíxeno pero non chegou a requirir ventilación mecánica, comezou onte a incorporarse na cama e "interactuar" co seu equipo médico, o que incrementou o optimismo sobre o seu estado. 

Johnson, que deu positivo por COVID-19 o pasado 27 de marzo, deixou temporalmente as rendas do Goberno nas mans do seu ministro de Exteriores, Dominic Raab. El foi quen se encargou esta tarde de comunicar nunha conferencia de prensa en Downing Street que na última xornada aumentaron en 881 os falecidos polo coronavirus rexistrados en hospitais do Reino Unido, ata 7.978. O titular de Exteriores recalcou que aínda non se atisba o pico da epidemia no país, polo que se alongarán as medidas de confinamento máis alá do próximo luns, cando termina o período de tres semanas inicial decretado polo Executivo.