A dirección de Borgwarner Vigo retirou o expediente de regulación de emprego (ERTE) que prevía a extinción de 103 contratos e iniciará a próxima semana un novo período de negociación cos sindicatos, que á súa vez desconvocaron a folga indefinida a partir do próximo luns. 

Fontes sindicais trasladaron que a empresa deuse de prazo ata setembro para atopar unha solución á situación da planta de Zamáns e para ese efecto solicitou a mediación do Consello Galego de Relacións Laborais. 

Esta compañía auxiliar da automoción criticaba este martes que o comité de empresa anunciase un calendario de mobilizacións sen manter sequera unha reunión coa dirección e sen expor ningunha proposta desde a apertura o pasado venres do período de consultas. 

Borgwarner xustificaba o ERE extintivo na "dramática" caída da produción de vehículos diésel. En todo caso, expresaba a súa vontade de diálogo para chegar a un consenso que beneficiara a ambas as partes sen que se poña en risco a competitividade e o futuro da empresa a medio e longo prazo.  

Namentres, os traballadores denunciaban que o plan de despedimentos por causas produtivas é incompatible coa vixencia do de causa de forza maior, e que a empresa tenta aproveitar "unha situación conxuntural" de caída de vendas para reaxustar o seu persoal e condicionar a negociación do convenio. 

Falaron tamén dun proceso de deslocalización de actividades produtivas á planta de Borgwarner en Viana do Castelo (Portugal) e sinalaron mesmo a posibilidade de que a de Vigo puidese acabar pechando. 

A planta de Vigo da empresa Borgwarner, que vende compoñentes de motores, segundo datos facilitados polo comité, conta cun persoal de 477 persoas e o ERE extintivo que a dirección expuña afectaba 31 de 129 técnicos; a 2 de 15 administrativos e a 70 de 306 obreiros.