Testemuños pétreos da historia de Bergondo son a súa ponte do Pedrido ou o pazo de Mariñán. Pero á historia tamén pertencen os recordos e as vivencias dos habitantes dun lugar.

E como estamos vivindo unha época insólita, o Concello de Bergondo quere deixar testemuño gráfico deste tempo. Por iso está a promover a iniciativa que denominaron 'Bergondo en aberto', un documental que van elaborar cos vídeos que os veciños envíen contando as súas experiencias durante o confinamento.

O documental tamén busca recoller as propostas dos veciños para ese futuro incerto que temos por diante, e enviar mensaxes de ánimo aos que o precisan.

Os que desexen participar teñen de prazo ata o venres para enviar os seus vídeos, gravados en horizontal e duns 30 segundos de duración.