A Dirección Xeral de Saúde Pública da Consellería de Sanidade informa na última actualización de datos de que o número de casos activos de coronavirus en Galicia é de 163, 17 menos que os notificados onte mércores.

Dos 163 casos, 39 son da área da Coruña, 74 da de Lugo, catro da de Ourense, nove da área de Pontevedra, 27 da área de Vigo, dez da de Santiago e ningún da área de Ferrol.

Oito dos pacientes positivos están en unidades de hospitalización e 155 no domicilio, e ningún se atopa en unidades UCI. Polo momento, en Galicia hai un total de 11.187 persoas curadas e rexistráronse 619 falecementos.

O número de probas PCR realizadas para detectar infección por coronavirus é de 238.786.

Na xornada de onte non se rexistraron falecementos en centros residenciais.