As autoridades australianas anunciaron hoxe que impoñerán desde a medianoite do mércores o confinamento durante seis semanas en Melbourne, con preto de 4,9 millóns de habitantes, tras un rebrote da COVID-19.

O primeiro ministro do estado Vitoria, Daniel Andrews, cuxa capital é Melbourne, anunciou a medida co obxectivo de controlar a expansión dos novos contaxios, que este martes rexistraron alí un máximo de 191 casos.

As autoridades anunciaron a véspera o peche das fronteiras entre os estados australianos de Vitoria e Nova Gales do Sur, os máis poboados do país, por primeira vez en 100 anos e que entra en vigor esta medianoite.