A rolda de contactos con Pedro Sánchez evidenciou a batalla entre PP e Ciudadanos por liderar o centrodereita na próxima lexislatura. A pesar de ser a terceira forza política no Congreso, os de Albert Rivera insisten en que van levar a batuta da oposición.

José Manuel Villegas, secretario xeral de Ciudadanos: "Liderar a oposición a este Goberno de Sánchez e intentar aglutinar todos os que están descontentos con este Goberno".

Os candidatos de Ciudadanos ás autonómicas e municipais insisten en que o seu adversario non é o PP, senón a esquerda. Pero Pablo Casado non o cre. Advirte de que Rivera podería acabar pactando cos socialistas para tocar poder.

Pablo Casado, presidente do PP: "Non sabemos sequera a día de hoxe se acabarán sendo a respiración asistida dos gobernos do Partido Socialista, municipais, autonómicos ou quen sabe se a nivel nacional en caso de que os resultados do 26 de maio fagan que o seu terceiro posto na lexislatura se faga demasiado longo durante catro anos".

Rivera pídelle ao presidente do PP que faga autocrítica e asuma responsabilidades polos malos resultados electorais.

Casado ironiza con que o líder de Ciudadanos celebre os seus tras trece anos á fronte do partido e catro derrotas nas urnas.