A farmacéutica estadounidense Pfizer e a firma alemá BioNTech anunciaron este mércores resultados positivos nos seus ensaios iniciais en humanos coa vacina para o coronavirus na que están a traballar. 

O estudo incluíu 45 adultos de entre 18 e 55 anos e nel probáronse distintas doses da vacina que, segundo as empresas, produciron anticorpos superiores aos de pacientes que se recuperaron da covid-19. 

Nun comunicado, a xefa de investigación e desenvolvemento de vacinas de Pfizer, Kathrin Jansen, dixo que os datos clínicos son positivos e que os traballos se están levando a cabo coa máxima urxencia. 

A vacina, segundo a nota, foi en xeral ben tolerada, aínda que nalgúns casos causou febres e dores locais onde foi inxectada, pero sen que se detectase ningunha reacción grave. 

Agora, as dúas compañías prevén usar a información solicitada para levar a cabo unha proba moito máis ampla, con ata 30.000 participantes, e que esperan comezar a finais de xullo se se recibe o visto e prace dos reguladores. Pfizer e BioNTech presentaron os datos do seu primeiro estudo para que sexan revisados por outros expertos e poidan ser publicados nunha publicación científica. 

As empresas indicaron que se o resto de probas resultan exitosas e a vacina recibe a aprobación dos reguladores, teñen intención de fabricar ata 100 millóns de doses no que queda de ano e potencialmente máis de 1.200 millóns durante 2021.  

Esta vacina súmase a varias máis en que están a traballar outras farmacéuticas de varios países e que tamén obtiveron resultados prometedores nas primeiras probas con humanos. Polo momento non se aprobou o uso xeneralizado de ningunha vacina contra o coronavirus, que deixou máis de medio millón de mortos en todo o mundo e máis de 10,5 millóns de casos confirmados. 

Habitualmente, o período para que unha vacina poida estar dispoñible para o seu uso a nivel masivo é de polo menos entre 12 e 18 meses, segundo a Organización Mundial da Saúde (OMS), aínda que neste caso hai a expectativa de que o proceso poida acelerarse.