EP

As malas condicións do mar trasladaron unhas sete millas o barco do cerco Sempre Güeto do lugar onde naufragou e acabou coa quilla ao sol, nas proximidades de Punta Candieira, en Cedeira, ata a zona de Punta Frouxeira, en Valdoviño.

Segundo explicaron fontes de Salvamento Marítimo, nas inmediacións atópase o remolcador SAR Gavia, pertencente a este organismo, e a lancha LS Langosteira, da Cruz Vermella, que "acompañan" o buque na súa travesía sen goberno. Ademais, detallaron que o obxectivo é poder unir o Sempre Güeto co remolcador a través dunha estacha e facer así remolque firme para o seu posterior traslado, acción que non está programada para este venres, 18 de xuño, debido ás malas condicións en que se atopa o mar na zona.

Está previsto realizar a operación de traslado, en principio ao porto de Ferrol, para este sábado, día 19. A bordo do remolcador de Salvamento Marítimo permanecen técnicos da base estratéxica deste departamento con sede no polígono industrial do Vilar do Colo, en Fene.