O Xulgado de Instrución número 2 de Lugo arquiva a peza da operación Pulpo referida aos gastos sociais dos traballadores da Deputación.

Esta investigación, instruída pola xuíza Pilar de Lara, analizaba o aboamento por parte da institución provincial de facturas médicas e viaxes a Eurodisney que se consideraban inxustificadas. A xuíza Sandra Piñeiro, segundo publica El Progreso, descarta que se cometesen delitos de malversación, prevaricación ou tráfico de influencias, xa que entende que eses gastos estaban xustificados polo convenio.

Nesta peza, agora arquivada, estaba investigado, entre outros, o que fora presidente da Deputación e exlíder do PSdeG Xosé Ramón Gómez Besteiro.