A Fiscalía Anticorrupción acusa o que fora vicepresidente económico Rodrigo Rato de once delitos contra a Facenda Pública, así como de branqueo de capitais, insolvencia punible, corrupción e falsidade documental, e pide para el ata 83 anos de cárcere. Nunha nota datada este martes, Anticorrupción solicita penas de prisión de entre catro e seis anos por cada un dos once delitos contra a Facenda Pública, seis anos polo delito de branqueo, catro polo delito de insolvencia punible, outros catro polo delito de corrupción nos negocios, e, finalmente, tres polo delito de falsidade documental.

Así mesmo, pide as correspondentes penas de multa e accesorias e a indemnización á Administración tributaria polas cantidades defraudadas en cada un dos exercicios fiscais indicados. O pasado 1 de marzo, o titular do xulgado de Instrución número 31 de Madrid decidiu procesar o exvicepresidente do Goberno e outras 16 persoas, físicas e xurídicas, por posibles delitos de corrupción nos negocios, branqueo de capitais e presunta elusión fiscal. 

No seu auto, o xuíz Antonio Serrano-Arnal daba por concluída a instrución do caso, que desde 2015 investiga a orixe do patrimonio do exministro. No comunicado coñecido hoxe, a Fiscalía asegura identificar incrementos patrimoniais non xustificados entre 2005 e 2015 por un importe total de 15,6 millóns de euros, ademais de rendementos de capital mobiliario no exterior tampouco declarados a Facenda, así como 7,4 millóns de euros defraudados á Axencia Tributaria. A esta última cifra, sinala Anticorrupción, habería que engadir a tributación de servizos profesionais a través das súas sociedades, co que as cotas defraudadas ascenderían a 8,5 millóns de euros.

Anticorrupción sostén que Rato mantivo desde 1999 un patrimonio oculto á Facenda española a través de diversas sociedades, coas que realizaría investimentos en "multitude de contas bancarias" abertas en Bahamas, Suíza, Luxemburgo, o Reino Unido, Suíza e Mónaco, entre outros. A documentación obtida en abril de 2015 tras o rexistro do domicilio de Rato e noutros lugares mostra que contaba tamén con contas nos Estados Unidos e Suíza descoñecidas para o Fisco español, e que operou a través de contas en territorios de baixa tributación como a Illa de Man, Kuwait e Curaçao. 

Deste xeito, prosegue Anticorrupción, Rato "serviuse, presuntamente, de estruturas financeiras para realizar movementos transfronteirizos de diñeiro encubertos a través de trust e sociedades opacas". Aínda que se acolleu en novembro de 2012 a unha amnistía fiscal, omitiu "calquera referencia" a unha serie de sociedades e declarou un patrimonio no exterior de 115.333 euros, polo que aboou 11.533 euros a Facenda. 

Anticorrupción ve tamén "indicios racionais" de que Rato, sendo presidente de Caixa Madrid- Bankia, cargo que ocupou entre xaneiro de 2010 e maio de 2012, cobrou indebidamente comisións procedentes dos contratos de publicidade que a entidade bancaria asinou con Publicis e Zenith, relativos á fusión e saída a bolsa da entidade. Ditas comisións, segundo a Fiscalía, deriváronse a diversas sociedades logrado "difuminar a orixe do diñeiro".

A causa aberta no xulgado madrileño inclúe a Intre e outras doce persoas, ademais de ambas as axencias de publicidade en calidade de persoas xurídicas.