A estas horas mantense activo o aviso laranxa por vento e mar de fondo no litoral das provincias da Coruña e Lugo. Temporal que rexistrou refachos máximos de preto de 100 quilómetros por hora na costa de Cedeira e que esta tarde deixou ondas que acadaron os cinco metros en puntos como Cabo Vilán ou Punta Lagosteira na Coruña. Nas Rías Baixas hai aviso amarelo por ondas de 4 a 5 metros e tamén por chuvia en toda a provincia de Pontevedra.

Na tarde deste mércores intensificáronse as chuvias e tamén o vento nas provincias costeiras. O temporal mantén o paseo marítimo da cidade da Coruña pechado na súa totalidade.

Na costa das provincias de Lugo e da Coruña a alerta laranxa deixou fortes ventos que superaron os 90 Km/hora na zona de Punta Candieira, en Cedeira. O mal estado do mar, con ondas que roldaron os 5 metros en puntos como Punta Lagosteira e Cabo Vilano, obrigou a manter a frota amarrada a porto. En Fisterra os mariñeiros daban a semana por rematada.

Este xoves o aviso laranxa amplíase a todo o litoral galego con ondas de máis de cinco metros. Amais na provincia de Pontevedra haberá aviso amarelo por chuvias. Aínda así o peor chegará o venres.