Alemaña pechará desde o mércores ata o 10 de xaneiro os colexios, escolas infantís e comercios non esenciais para frear a segunda vaga da pandemia, que afecta o país con especial virulencia estas semanas.

A chanceler Angela Merkel, que se reuniu este domingo cos representantes dos lánder, confirmou a decisión tras o encontro.

A restrición únese ao peche de bares, restaurantes, teatros, cinemas, museos e instalacións deportivas clausuradas desde hai seis semanas.

Nas últimas 24 horas o país rexistrou 20.200 contaxios, o peor dato nun domingo en toda a epidemia, e 321 mortes, conforme o Instituto Koch.

As cifras de contaxios e de mortes seguen esta fin de semana en Alemaña na liña de máximos que se alcanzaron o venres. Merkel decide estas medidas tan drásticas coma as de marzo ante o avance imparable da segunda vaga en Alemaña, referente antes para Europa e o mundo na contención do virus.