Con moitos meses de atraso, hoxe o Consello de Ministros aproba finalmente o estatuto da industria electrointensiva, importante para Galicia porque rebaixa substancialmente a factura da luz de empresas que consomen moitísimo, por exemplo Alcoa; se reducen gastos, poden aumentar beneficios e ser máis viables.

Hai que lembrar que Alcoa gasta 400 millóns de euros ao ano en enerxía eléctrica. En Galicia hai 31 industrias, grandes consumidoras, que se verán beneficiadas por este estatuto das electrointensivas, que poderían bonificar ata o 85 por cento da súa factura en electricidade. O desconto beneficiará un total dunhas 600 empresas en toda España.

Ademais do sector do aluminio, os grandes beneficiarios serían outros da industria pesada, como os do aceiro ou o cemento.

A posta en marcha desta nova medida está prevista para o 1 de xaneiro, dous anos despois de que se prometera a súa instauración. Haberá que esperar a ver se chega a tempo, por exemplo, para salvar o futuro de Alcoa.