Non para. O camiño segue a fornecer de visitantes a capital galega e as vilas polas que pasa, malia a pandemia. Iso si, en cantidade inferior. Neste mes de agosto pouco se pasou dos 20.000 peregrinos, mentres que as cifras previas á covid−19 eran o cuádruplo.

A afluencia de visitantes á catedral segue malia rematar xa o mes de agosto. Tampouco o movemento de peregrinos parece minguar. A Oficina do Peregrino expediu no pasado mes un total de 21.771 compostelas, case na súa totalidade a cidadáns europeos, os estranxeiros máis abondosos; arredor do milleiro, os que chegaron dende as Américas.

O perfil de quen peregrina é o dunha persoa de 30 a 60 anos, española, que chega a pé, a maioría comeza dende Sarria ou fai outras etapas curtas, sobre todo polo Camiño Francés.

Hai moitas experiencias do camiño: "A min o que máis me sorprendeu foi a conexión coas persoas e o espírito global, como un espírito compartido que se respira, como de colaboración, como que aflora a parte máis bonita dos seres humanos; iso gústame moito e lévoo, de compañeirismo, de axuda, todo o mundo quería darnos tiras adhesivas para os pés...". "Xa estamos planificando o ano que vén: que se a ruta portuguesa, que se a primitiva, que se a do norte ou a dos faros. Que, cando e como facer. É precioso. Viñemos soas pero coñecemos moita xente, e a seguir". "É a primeira vez e por un lado impresionoume e por outro non esperaba que fose tan duro; supoño que facéndoo en escalas máis curtas non sería tan duro". "Veño só pero fixen unha boa amizade con toda a xente e con todos os que saímos dende Sarria".

Aínda que esta cifra apenas representa a terceira parte do volume de peregrinos que recibiron a credencial no mesmo mes do 2019, antes da pandemia, supera a afluencia de agosto do ano pasado. E a chegada de peregrinos segue medrando conforme vai mellorando a situación da COVID−19. Só onte, na Oficina do Peregrino tramitaron case un milleiro de compostelas.