O Xulgado de Instrución número 4 de Vigo absolveu o dono da pirotecnia responsable da tirada dos fogos artificiais das festas de Bouzas de xullo de 2019 que causou danos en máis de 340 vehículos de PSA-Peugeot, así como dous dos seus empregados.

O xuíz considera, segundo informa o Tribunal Superior de Xustiza de Galicia, que deben ser absoltos do delito leve de danos por imprudencia grave do que estaban acusados porque “non se aprecia neglixencia ou omisión algunha de carácter grave”.

O maxistrado salienta que de toda a proba achegada e practicada se deduce que os acusados coñecían “o perigo concreto da súa actividade” e que cumpriron “con todo o que lles correspondía para evitar ese dano, pois comprobaron o vento existente, orientaron os disparos cara á zona do mar e ampliaron a distancia de seguridade, a pesar de non ser legalmente esixido conforme á normativa aplicable”.