Abanca desvela os seus plans de futuro para o Deportivo da Coruña. A entidade presidida por Juan Carlos Escotet márcase como obxectivo sanear o club e endereitar o seu rumbo antes de buscar un novo propietario que asuma as rendas do conxunto branco e azul.

Na memoria anual de Abanca Corporación Bancaria, que foi remitida á Comisión Nacional do Mercado de Valores (CNMV) este luns, consta que a capitalización de débeda por valor de 35 millóns de euros que o banco galego realizou no Deportivo "formalizouse co obxectivo de participar na xestión e reestruturación da sociedade, poñéndoa en valor no menor prazo posible e establecer un plan de venda para dar entrada a novos socios e recuperar o investimento realizado".