EFE

A Universidade de Vigo aprobou impartir un título propio de Especialista en Ciberseguridade Industrial, un título único en Galicia que comezará o próximo mes de xaneiro para un máximo de 30 alumnos. 

Segue así a UVigo o informe ‘Galicia 2030: Proposta de novas titulacións para ou  SUG’, onde se sinala o campo da ciberseguridade na contorna industrial como un dos nichos laborais con máis futuro e necesitado ao mesmo tempo dunha formación específica que agora non existe na a comunidade autónoma. 

O título da UVigo impartirase completamente en liña a través do campus Remoto co obxectivo de abrir “o espectro de participantes a toda España e mesmo a Latinoamércia”, dixo á revista da UVigo José Ignacio Armesto, coordinador deste título xunto a Miguel Díaz-Cacho, ambos do Departamento de Enxeñería de Sistemas e Automática. 

Segundo Arnesto o curso pretende “cubrir o oco que hai entre os perfís formativos industrial e das tecnoloxías da información e comunicacións, xerando un novo perfil especialista en ciberseguridade industrial”. 

Esta profesión está cada vez máis demandada polo sector, xa que a industria 4.0 implica un incremento substancial da conectividade nas empresas tanto entre as liñas de produción e as máquinas, como entre as máquinas e os sistemas de xestión de produción.  

A iso hai que sumar a conectividade a través de Internet para ofrecer servizos de mantemento e captación de información das máquinas. Neste escenario xorden riscos e vulnerabilidades novos que teñen que ser xestionados adecuadamente adoptando as medidas de protección necesarias para evitar ciberataques, perdas na propiedade intelectual das compañías ou mesmo a paralización da produción.