Vitoria moi importante da selección olímpica de baloncesto feminino contra Serbia (85-70), que lle permite ter pé e medio nos cuartos de final.

As de Lucas Mondelo acadaron a súa segunda vitoria consecutiva nun partido en que foron de menos a máis. Serbia comezou dominando e por diante no marcador. España tivo que sacar a calidade individual para rematar co partido, sobre todo nun último cuarto espectacular cun parcial de 26-12.

A ourensá Raquel Carrera estivo 14:50 minutos en pista, tempo no que sumou 4 puntos, 3 asistencias e 1 rebote. Tivo ademais un gran papel no aspecto defensivo. Hoxe non xogou a ferrolá Tamara Abalde.

O vindeiro envite será este domingo contra Canadá.