Hostaleiros e vendedores agardaban este día coma auga de maio e chover, choveu. Pero ademais, na praza reapareceron os cociñeiros e propietarios de restaurantes para mercar os produtos do seu menú de reapertura. Uns e outros esperan que este sexa o comezo da recuperación dos seus negocios, aínda que o permiso para abrir os collera por sorpresa.

Hoxe o menú vai ser sargo e papos comprados na praza de abastos que o local ten fronte á porta. Alí a súa reaparición foi motivo de alegría.

Iso si, as compras realizáronse con gran prudencia. Os hostaleiros impulsarán as vendas na praza, pero ao non haber ceas de empresa, nin grandes reunións de amigos e familiares, os vendedores do mercado non cren que o negocio sexa o habitual nesta época do ano. Agora só queda ter a festa en paz.