Os viveiros locen nesta época en todo o seu esplendor e entre planta e planta agroman cada vez máis clientes.

A raíz do confinamento a xente fíxase máis nas necesidade do seu fogar. Daquela aumentaron as reforma e agora en plena primavera destaca a febre pola xardinería. En viveiros coma este aumentou a venda de todo tipo de plantas e é que pasamos máis tempo na casa e queremos que sexa un espazo agradable e fermoso.

Entre os que teñen xardín destaca a demanda de frutais. Tamén están os que buscan colorido con plantas de tempada e mesmo os que se animan coas hortalizas aínda que sexa para poñer no balcón.

"Este ano véndense moitas árbores froiteiras, arandos, limoeiros, laranxeiras..., de todo. Hai quen leva dúas leitugas ou dous tomates para poñen no balcón. En plantas agora as que teñen máis demandas son as petunias e o xeranios, os pelargonios, as hortensias e os hibiscos", conta Manuel González, que é propietario dun viveiro en Lugo.

Pero tamén están en auxe as plantas de interior. A xente busca vida para decorar o fogar. Gusta o verde, pero reclaman plantas resistentes e que requiran pouco mantemento.

"Agora lévanse moito as kentias, son verdes tipo palmeira. Calteas tamén, buscan plantas verdes con tronco gordiño e que requira poucos coidados", sinala Carmen Costoya que ten unha florería en Lugo.

En plena era de Internet, moitos sacan ideas das redes e chegan aquí buscando cousas concretas.

"Véñenche con capturas de pantalla pedindo algo así, pero o de pinterest é increíble, veñen coa foto preguntando se a tes ou podes pedila". "Miran moito por Internet e veñen cos nombres latinos que ás veces un non sabe de que falan".

Hai plantas de todos os tamaños, para todos os petos e para todo tipo de coidados.