Os primeiros campionatos de caza do raposo deste ano en Galicia desenvolvéronse rodeados de polémica e ata de dúas supostas agresións, segundo os animalistas. Aínda que autorizados pola Xunta de Galicia, diversos grupos intentaron boicotear os campionatos con chifres e pandeiretas. Dende a Federación Galega de Caza aseguran que lles precintaron con silicona as pechaduras do pabillón da zona de Cerdedo-Cotobade e que lles botaron pemento picante aos cans. Pola súa parte, os activistas denuncian dúas agresións por parte dos cazadores e que a Xunta está incumprindo un acordo parlamentario ao destinar ata 35.000 euros en subvencións ás cacerías.