A planta que ten PSA en Vigo está en máximos de produción. O responsable da factoría di que a situación é boa e agarda manter o ritmo que fixo do mes de setembro o mellor da súa historia. Con todo, recoñece incerteza pola evolución da economía e da demanda dos coches eléctricos.

Con catro quendas traballando nas dúas liñas por primeira vez na súa historia, a factoría de Vigo está en máximos de produción. Ignacio Bueno, presidente da Planta de PSA de Vigo explica que "o mes de setembro foi un més récord histórico, por máis de catro mil coches comparado co mellor mes da historia. E agora o que temos que ver é que se manteña. A situación económica é moi incerta".

Desta planta saíron en setembro 59.000 vehículos e máis de 330.000 no que vai de ano. Aquí prodúcense cada día 2.330 coches de nove modelos diferentes. Con todo, a parada obrigada pola pandemia dificulta bater as marcas fixadas para este ano.

"Estamos nun efecto de estancamento da demanda dos meses de pandemia. Pero hai que ver que a economía siga, que os vehículos eléctricos se vaian consumindo para manter estes ritmos", mantén Ignacio Bueno.

Moi pendentes do mercado exterior, o 90% dos vehículos destínanse ao estranxeiro, principalmente a Francia, Alemaña, Gran Bretaña e Turquía.